Þessar tunnur höfðu staðið lengi í alfaraleið við Gæsavötn, til mikillar óprýði, en voru sem betur fer fjarlægðar á dögunum.

Nú líður væntanlega að því að menn fara að huga að bensínmálum sínum á hálendinu fyrir komandi vetur. Í þeim efnum eru nokkur atriði sem vert er að hafa í huga.

Erum á gráu svæði

Augljóst hagræði er af því að eiga bensín á góðum stað til að nota í vetrarferðum. Því er jafnan komið fyrir í námunda við fjölsótta skála og t.d. eiga Eyfirðingar og fleiri að jafnaði talsverðar byrgðir í Laugafelli, Gæsavötnum og víðar. Er nú svo komið að bensínmagnið bara á þessum tveimur stöðum sem nefndir voru mælist í tugum þúsunda lítra þegar allir hafa komið með sitt á haustin. Ljóst má vera að við erum á talsvert gráu svæði með þessi bensínmál því strangar reglur gilda um geymslu á bensíni. Við höfum hins vegar að mestu fengið frið enn sem komið er en það er alls ekki sjálfgefið að svo verði alltaf. Mesta hættan er að menn gleymi sér og hugi ekki nógu vel að fráganginum þannig að einhver “óviðkomandi” sem leið á um geri úr þessu mál. Mikilvægt er að miða allan frágang við að sem minnst hætta sé á að þetta pirri aðra fjallafara, þ.e. sé sem minnst áberandi.

Gangið vel frá körunum

Ef aðstæður eru þannig að bensínílátin séu á staðnum allt árið (sbr. öll kerin í Gæsavötnum) verður að ganga þannig frá að þau séu, utan mestu alfaraleiðar, hulin með grjóti og sem alla minnst áberandi. Sérstaklega mikilvægt er að vanda frágang í síðustu ferð að vori því þegar hálendisvegir opna stóreykst umferð fólks sem er e.t.v. ekkert sérlega hrifið af því að aka eða ganga fram á hrúu af fiskikörum fullum af bensínbrúsum. Misbrestur hefur verið á þessum frágangi í Gæsavötnum, eins og fram kom hér á vefnum ekki alls fyrir löngu. Þó er ánægjulegt að segja frá því að í kjölfar þeirrar umfjöllunar batnaði ástandið til muna og verstu dæmin voru fjarlægð.

Því seinna því betra

Ef um er að ræða ílát sem farið er með að hausti og tekin aftur að vori, eins og t.d. bensínkerrur, tunnur eða slíkt, er mikilvægt að menn fresti því í lengstu lög á haustin að fara með bensínið en taki síðan afganginn sama dag og hálendisvegir opna á vorin. Í kjölfar norðanáttarinnar að undanförnu hefur komið föl á jörð og því líklegt að margir vilji drífa sig af stað með bensínkerrurnar sínar. Þótt ekki sé hægt að banna mönnum það verður þó að teljast líklegt að allur sá snjór sem kominn er og kemur næstu daga eigi eftir að hverfa aftur. Því gæti verið ráðlegt að fresta för enn um sinn.