Við áramót tíðkast að líta um öxl og rifja upp það sem hæst bar á gamla árinu. Því er ekki úr vegi að renna yfir hvernig vélsleðaárið 2002 kom lesendum Sleðasíðu HA fyrir sjónir. Eins og jafnan þegar annálar eru annars vegar er mjög stiklað á stóru.

Janúar:
Stærstu tíðindi janúarmánuðar voru án efa þegar Yamaha öllum að óvörum afhjúpaði RX-1, fyrsta „alvöru” fjórgengissleðann sem er samkeppnisfær í hópi öflugustu tvígengissleða. Menn áttu vart til nógu stór lýsingarorð í fórum sínum enda stökkið í raun stærra en nokkurn gat órað fyrir. Þó nokkrir sleðar hafa selst hérlendis og ekki annað vitað en að sleðinn standist þær væntingar sem til hans eru gerðar. Hann er vissulega talsvert þyngri en tvígengissleðar en ætti engu að síður að geta hentað ýmsum vel, t.d. til ferðalaga.
Arctic Cat komst einnig í fréttirnar í janúar. Þá var boðuð koma tveggja nýrra sleða sem síðan voru settir á markað í Bandaríkjunum í lok mánaðarins. Stóru tíðindin voru þau að báðir eru með 900 cc tveggja strokka vél og Kattarmenn því fyrstir til að bjóða slíkt. Einn slíkur sleði í Mountain Cat útfæslu rataði til Íslands ekki löngu síðar. Þá boðaði Arctcic Cat einnig komu 2003 árgerðarinnar þar sem Firecat sleðarnir vöktu verðskuldaða athygli, enda mögnuð tæki eins og eigendur þeirra hérlendis hafa þegar sannreynt.
Frá Haftækni bárust þær fréttir að búið væri að útbúa Íslandskort fyrir Garmin GPS tæki. Góðar fréttir fyrir ferðakarla og kerlingar.
Af snjóalögum á Íslandi voru ekki eins upplífgandi fréttir. „Nú er það svart á hálendinu“ hljóðaði fyrirsögn 7. janúar en þar sagði af jeppaferð inn í Gæsavötn helgina á undan.

Febrúar:
Framleiðendur héldu áfram að kynna 2003 árgerðina í febrúar. Ski-doo kom fram með REV-sleðana og menn fengu vart vatni haldið af hrifningu. Einnig var kynnt 800 vél með nýrri gerð af innspýtingu, SDI, sem sögð var marka tímamót í smíði tvígengisvéla fyrir vélsleða.
Hér heima komust Eyfirðingar fyrstu ferð vetrarins á sleða inn í Laugafell. Þá var komið fram í miðjan febrúar sem sagði meira en mörg orð um snjóalögin framan af vetri. Ferðalangar báru nú þær fréttir af snjólaögum á hálendinu að þau væru öll að koma til. Inn á Glerárdal var þá einnig kominn góður snjór og lyftist nú heldur á mönnum brúnin. Keppnisvertíðin hófst með móti á Dalvík þar sem Alexander „Lexi“ Kárason stóð sig manna best og tilkynnt var um að þættir um snjókrossið yrðu sýndir í Ríkissjónvarpinu þá um veturinn. Þá bættist nýr vefmiðill við þegar snow.is fór í loftið.
En því miður voru ekki allar fréttir mánaðarins jafn ánægjulegar. Þá lést á 63. aldursári, Tómas Eyþórsson, fyrrverandi umboðsmaður Polaris á Íslandi. Tómas var umboðsmaður fyrir Polaris í hátt í þrjá áratugi og er óumdeildanlega einn af þeim sem eiga hvað drýgstan þátt í þróun sleðamennsku hér á landi. Með brotthvarfi hans lauk ákveðnum kafla í þeirri sögu.

Mars:
Polaris kynnti 2003 árgrðina til sögunnar í mars og innihélt hún m.a. nýju Pro X línuna og Vertical Escape púðursleðann. Þá kynnti Blade áform sín um nýjan fjórgengissleða með 1.500 cc vél.
Í Bandaríkjunum lauk WSA-mótaröðinni og það var Arctic Cat ökumaðurinn Tucker Hibbert sem stóð uppi sem meistari í bæði Pro Stock og Pro Open, þrátt fyrir að helsti keppinautur hans, Blair Morgan á Ski-doo, inni sigur í báðum flokkum í lokakeppninni. Af keppnismálum innanlands bar Mývatnsmótið hæst og þar sigraði einnig samni maður bæði í Pro Stock og Pro Open. Sá ók hins vegar Lynx og heitir Halldór „Wisegrip“ Óskarsson.

Apríl:
Aprílmánuður rann upp bjartur og fagur og var nú ekið sem aldrei fyrr. EY-LÍV stóð til að mynda fyrir vel heppnaðri ferð í Skagaförð og í Kerlingafjöllum héldu menn mikið mót og blautt. Keppnismenn létu ekki sitt eftir liggja og flugu um loftin blá á fákum sínum. Yfir Atlantshafið frá Bandaríkjunum flugu einnig nokkrir kappar til að taka þátt í alþjóðlegu móti í Ólafsfirði og sýndu góða takta. Síðustu helgina í apríl lauk keppnistímabilinu með móti á Egilsstöðum og varð Árni Þór Bjarnason Íslandsmeistari í Pro Open en Alexander Kárason í Pro Sport. Nýju Lynxsleðarnir af 2003 árgerðinni voru einnig kynntir undir lok mánaðarins.
Frá Jöklarannsóknafélaginu bárust þær fréttir í apríl að nánast allir jöklar landsins hafi hopað á árinu 2001 en félgið sjálft sótti engu að síður fram og kom fyrir nýjum skála í Esjufjöllum um miðjan mánuðinn.

Maí-september:
Þegar kom fram í maí fór heldur að hægjast um þótt menn héldu áfram að aka grimmt og færu í magnaðar vorferðir þar sem veðurblíðan lék við menn. Helst bar til tíðinda í þessum ferðum hjá Eyfirðingum að þær kostuðu óvenju marga driföxla. Voru sumir einnig gripnir með allt niðir um sig. Þær fréttir bárust einnig að sala á vélsleðum hefði dregist lítillega saman á milli ára, skv. tölum frá Samtökum vélsleðaframleiðenda (ISMA). Sleðamenn af öllu landinu hittust á vel heppnuðu „Sumar-djambori“ á Langjökli og í september opnaði Félag vélsleðamanna í Eyjafirði, EY-LÍV, eigin heimasíðu.

Október.
Í október fór að færast líf í tuskurnar á nýjan leik. Húsvíkingar gengust fyrir grasspyrnu en sýndu hins vegar takmarkaða gestrisni og „jörðuðu” keppinauta sína í brautinni.
Landsfundur LÍV var haldinn á Hveravöllum og tókst vel í alla staði. Jón Birgir hélt dauðahaldi í forsetastólinn við mikla hrifningu viðstaddra, enda staðið sig með sóma. EY-LÍV hélt einnig aðalfund sinn og þar var svipað uppi á teningnum. Formaðurinn neitaði að víkja. Á aðalfundi LÍV var upplýst um þreifingar Reykjavíkur-LÍV-félaga um aðgengi að endurvarpakerfi 4×4 klúbbsins og varð það að veruleika nú ekki alls fyrir löngu.
Breytingar urðu á umboðsmálum þegar Arctic Trucks tók við umboðinu fyrir Yamaha af Merkúr.

Nóvember:
Í síðari hluta október snjóaði drjúgt fyrir norðan og fyrstu daga nóvembermánaðar freistuðu nokkrir bjartsýnismenn þess að komast á sleðum upp úr Eyjafirði og inn í Laugafell. Það tókst, enda harðsnúið lið á ferð.
Félögin héldu sýningar sínar og árshátíðir í síðari hluta mánaðarins og var mikið um dýrðir samkvæmt venju.

Desember:
LÍV-Reykjavík var með aðalfund í byrjun desember og settu formanninn á. Einnig brast á með sumarblíðu um allt land með óæskilegum afleiðingum fyrir snjóalög. Reyndir sleðamenn héldu þó ró sinni til fullnustu og þóttust vita að snjórinn kæmi á endanum. Þegar að var gáð reynist líka vera nokkur snjór hærra uppi og óku menn nokkuð grimmt undir lok ársins.